Polis nga nakapusil sa tulisan pasidunggan

Polis nga nakapusil sa usa ka tulisan nga mition kaniya og armas gibati'g kakuyaw sa hitabo ug mapasalamaton nga wala mapatay ang suspek bisan kini iyang napusilan.

Si PO1 Jerome Morales, sakop sa Regional Investigation and Intelligence Division sa Police Regional Office 7 mitug-an sa Banat News nga gibati siya'g kahadlok dihang mition usab kaniya ang suspek sa dala niining armas.

"Pagsaka na gyud sa iyang armas, nakuyawan na gyud ko, pero pasalamat sad ko kay naunhan nako siya, maayo na lang gyud kay wala siya mamatay kay ang ato ana niya nga ma-neutralize siya," asoy pang Morales.

Si Morales maoy mipusil sa suspetsadong tulisan nga si Lemuel Enginella,18, alyas Lemuel Radaza, nga taga Paradise Subdivision sa Kinasang-an, Pardo ning dakbayan.

Si Enginella misuway unta og tago sulod sa usa ka restaurant human tulisa si Oliva Basnillo, 20 sulod sa usa ka PUJ. Gisuwayan usab unta og hostage ni Enginella ang usa ka 17 anyos nga tinun-an nga si Cheryll Mae Yunson apan nahadlok kini dihang miduol ang gwardiyang si Romeo Flores.

Diha na midagan si Enginella subay sa exit door apan wala siya magdahum nga nagpaabot na kaniya si Morales.

Si Enginella naigo diha sa iyang tuong kilid ug nilapos sa bala sa likod. Tungod sa pagkaigo nabuhian niini ang armas nga .357 kalibre nga may lima ka buhing bala ug ang bag ni Basnillo.

Kauban ni Morales niadtong higayuna ang iyang usa pa ka tuig nga anak nga lalaki, unom ka buwang mabdos nga asawa ug iyang 57 anyos nga inahang si Criselda.

Matud pang Morales pagkadungog sa buto sa pusil, nabalaka ang iyang asawa samtang ang iyang inahan kalit nga nakalitok sa pag-ingon og, "pag-ampo mo nga si Jerome ang nakapabuto," asoy pang Morales.

Si Supt. Melvin Gayotin, ang acting director sa CCPO nagkanayon nga mopadala siya og rekomendasyon sa city hall ug sa PRO7 nga pahatagan og pasidungog si Morales sa iyang gihimong aksyon.

Nabatasan na ni Mayor Tomas Osmeña ang paghatag og kwarta ngadto sa mga polis nga makapusil og tulisan dinhi sa Sugbo isip pahalipay kanila.

Samtang si Morales mitug-an nga agdon lang niya kung dunay kamandoang pabalhinon siya dinhi sa CCPO gikan sa PRO7.