Innova patrol car wa mokarga sa biktima, wa ikasuko ni Tomas

Wala masuko si Mayor Tomas Osmeña sa mga polis nga giingong mibalibad pagpagamit sa Toyota Innova patrol car aron unta paghatod og biktima sa tambalanan sa nahitabong pagpamusil didto sa barangay Pasil niadtong niaging Sabado.

Atol sa press conference kagahapon sa udto gibutyag ni Osmeña nga normal lang ug nakasabot siya sa gipakitang reaksiyon sa maong mga polis ilabi na kay bag-o pa ang maong mga sakyanan nga gihatag sa siyudad ngadto sa kapolisan ug sila maoy mahasol sa paglimpyo niini.

Apan kun si Osmeña ang pabut-on gikinahanglan nga dili mobalibad ang mga polis kun dunay mohangyo nga kadugo sa mga biktima nga mahatod ang pasyente sa tambalanan aron pagsalbar sa kinabuhi sa usa ka tawo.

Apan tungod kay gidonar sa siyudad sa Sugbo ang maong 20 ka Toyota Innova ngadto sa kapolisan gihatagan sab niya og katungod ang kapolisan nga modesisyon kun ila bang ipagamit o kargahan og mga biktima ang maong mga sakyanan paghatod sa tambalanan.

Nasayran nga bag-o pa lang gitugyan og balik sa mayor ngadto sa Cebu City Police Office (CCPO) ang maong mga sakyanan human gibalhin na og destino gawas sa Sugbo si PO2 Junicar Estiñoso nga migamit sa Toyota Innova nga nagdala og babaye nga ni-check og hotel nga gihatod ni PO1 Stuart Balang og aksidEnting nakabangga og taxi.