Ang maong tigum sumala pang Konsehal Augustus Pe,Jr. ang tsirman sa committee on dangerous drugs sa konseho, usa ka paagi sa pag-edukar sa kabataan aron batukan ang ilegal nga drugas sanglit sila maoy nag-unang target niini.
Ang maong mga batan-on gikan sa 35 ka mga barangay ug 20 ka mga tunghaan dinhi sa dakbayan ug sagad kanila nahatagan og "OK Ka Kid" membership ID isip hiniusang lakang gikan sa habig sa kabataan aron mapatuman ang drug-free style lifestyle sa mga tunghaan ug komunidad.
Ang panagtigum gihigayon sa Cebu Normal University Social Hall diin sila si Philippine Drug Enforcement Agency-7 legal officer,Atty. Paul Clarence Oaminal ug Center Director of Recovery House, Vicente Aldanse maoy namulong kabahin sa peligro sa paggamit sa iligal nga drugas.
Ang duha pulos nagtuong kinahanglang pangusgan ang pag-edukar sa kabataan aron batukan ang ilegal nga drugas ug aron malikay sa tentasyon niini.
Ning bag-ohay lang si Interior secretary Ronaldo Puno miawhag sa tanang lokal nga kagamhanan sa tibuok nasud sa pag-establisar ug paghimo og special drug education centers (SDEC) alang sa mga out-of-school youth (OSY) ug mga street children aron matabangan ang mga biktima nga malikay sa pag-abuso sa drugas diha palang sa ilang lokalidad.
Kinahanglan nga ang maong mga sentro idumala sa mga social welfare workers nga full-time ang trabaho, dunay kaugalingong mga kawani ug mga labaw.
Ang maong mga sentro kinahanglang dunay library, kan-anan, counseling room, conference room, tutoring room, kusina,kasilyas ug katulganan.