Project engineer sa DPWH-7 naligsan og 10-wheeler truck

Patay dihadiha ang project engineer sa Department of Public Works and Highways (DPWH-7) human kini maligsi sa 10-wheeler truck sa Ouano Avenue, Reclamation Area, Mandaue kagahapon sa buntag.

Ang biktima mao si Engr. Edgar Sanchez, 44, taga Ibabao, Mandaue ug kawani sa DPWH-7.

Sa pasiunang imbestigasyon nga gihimo ni PO3 Nestor Montecillo sa Traffic Division sa Mandaue nasuta nga ang drayber sa 10-wheeler cargo truck nga si Marlou Requieron, 25, taga sitio Sacris, Bakilid, Mandaue.

Matud pa ni Requieron samtang nagmaneho sa trak padulong sa dakbayan sa Sugbo, iya nang nakita si Sanchez nga anaa sa pikas lane luwan sa iyang gimanehong motor sa susamang direksiyon ug kalit lang kining nawagtang.

Nasuta ni Requieron nga iya nang naligsan si Sanchez sa luyo nga bahin sa iyang trak hinungdan sa paghunong niini. Si PO3 Montecillo miingon nga human sa maong insidente dali nga mitahan sa kapolisan sa Mandaue si Requieron ug kasamtangan kining gibalhog sa station 2 sa Mandaue City Police Office.

Si Requieron pasakaan kini og kasong Reckless Imprudence resulting to Homicide sa Mandaue City Prosecutors Office.