MOA gipirmahan ni Gwen, LTO, PRO-7

Si Gobernador Gwendolyn Garcia, Land Transportation Office-7 Director Alex Leyson, ug Police Regional Office-7 Director Chief Supt. Silverio Alarcio Jr. nagpinirmahay og kasabutan alang sa pagpahapsay sa dagan sa trapiko sa lalawigan.

Ang memorandum of agreement gipirmahan kagahapon human makadawat ang buhatan ni Garcia og mga reklamo gikan sa mga motorista kabahin sa dili maayong sitwasyon sa trapiko sa mga lungsod.

Usa usab sa hinungdan sa pagsagop sa kasabutan mao ang reklamo sa mga motorista batok sa mga abusado nga mga traffic enforcers nga gi-deputize sa LTO.

Bisan nahimo ang pinirmahay ning higayon nga nagsingabot na ang Asean summit, gitug-an ni Garcia nga gitumong kini dili lamang alang sa pagpahapsay sa sitwasyon sa trapiko tumong sa maong internasyonal nga kalihukan.

Si Garcia nagkanayon nga gikasabutan usab ang pagdisiplina sa mga masalaypon nga mga traffic enforcers, sama sa pagdisiplina sa mga masalaypon nga mga drayber.

Nasabutan usab nga i-revoke ang deputization sa mga civilian agent sa LTO nga mapamatud-an nga dili epektibo sa trabaho. Dugang niini, ang mga civilian agents palihukon lamang panahon sa piyesta.