Delegasyon sa ASEAN Summit sugaton og Sinulog — Paynor

Usa ka pasundayag unya ang ihalad sa mga kabataan ngadto sa mga delagado sa umaabot nga ASEAN Summit karong Disyembre diin ipakita niini ang kultura sa mga cebuano pinaagi sa pagsayaw og Sinulog diha sa Mactan Cebu International Airport.

"It is an opportunity for Cebu to boast and further promote the Sinulog Festival, an annual event every January that has been a major tourist event for balikbayans, foreign and local tourist alike," matud pa ni Ambassador Marciano Paynor, ang secretary general sa National Organization Committee sa 12th ASEAN Summit.

Sumala pa ni Paynor nga mao kini ang gusto ni Presidente Arroyo nga ipakita ang pagka o talagsaon sa mga Cebuano ug mao kana ang pagsayaw niini ug Sinulog nga inubanan sa makusog nga kanta ug pagsyagit "Viva Pit Senyor" ug mao kini hinungdan kun nganong naila ang Cebu sa pinakaanindot nga tourist event dinhi sa Pilipinas.

Si Gobernador Gwen Garcia nga co-chairman sa Cebu Organizing Committee sa maong summit mipadayag nga dili problema ang welcome reception tungod kay gihimo na usab kini nila sa dihang ang siyudad sa Sugbo mi-host sa SouthEast Asian Games kaniadto.

Sa laing bahin dili mominus sa 150 ka estudyante ang gibana-bana nga mahimong liaison volunteers nga moabag unya sa maong summit diin ang mga miyembro sa committee nagkahiusa sa maong desisyon sa dihang nagmiting kini alang sa preparasyon sa ASEAN Summit.

Ang munisipyo sa Cordova nga maoy sub-committee chairman sa liaison services, mitaho nga ang mga estudyante nga maoy mo-assist sa mga bisita gibansay-bansay na ug kini nagsugod niadtong miaging Oktobre 21 ug mahuman kini karong Nobiyembre 12 sayo ning tuiga.

Si Lily Apoy, ang representante ni Cordova Mayor Arleigh Sitoy, miingon nga gi-orient ang mga estudyante mahitungod sa customer service, protocol, communications, history, team building ug organizational dynamics.