Hunta andam mopasar budget para sa CICC

Andam mopasar og supplemental budget ang hunta probinsiyal sa lalawigan sa Sugbo aron ihapak sa pagpatiwas sa Cebu International Convention Center (CICC).

Ang mga bokal sa hunta probinsiyal sa Sugbo personal nga miadto sa CICC aron sa pagsusi niini.

Ang mga bokal nakapamahayag nga magamit ang CICC apan dili sa tukmang panahon nga gitagal sa mga protocol officers sa umaabot nga Asean summit.

Si Bokal Agnes Magpale nagkanayon nga dili na lang hunahunaon ang political affiliation ug isalikway ang partisan politics aron magtinabangay pagtiwas sa CICC tungod ug alang sa reputasyon sa probinsiya sa Sugbo.

Uban ni Magpale sila si Bise Goberndor Gregorio Sanchez Jr., mga bokal Victor Maambong, Antonio Almirante, Juan Bolo, Alfie Ouano, Carmiano Kintanar.

Si Gobernador Gwendolyn Garcia sa iyang bahin misagop sa plano sa hunta probinsiyal nga magpagawas og supplemental budget aron itiwas pag-ugmad sa kontrobersyal nga CICC.

Subling gipahibalo ni Garcia nga ang Nobiyembre 15 nga deadline usa lamang ka self-imposed aron ma-monitor kun unsa man ang mga kakulangan nga angay idugang ug angay tiwason.

"Wait and see na lang and we must remain firm and determined on what we have promised as expected."

Giawhag niya ang mga Sugboanon nga dili magpadala sa mga kritiko nga padayong nanglantaw og negatibo kabahin sa katukoran sa CICC. "Let us prove to everyone that Cebu is trully the showcase of what Philippines can be."