P100 mil ang danyos sa sunog sa Asturias

Mikabat sa P100, 000 ang gibiling danyos sa sunog sa dihang tulo ka panimalay ang naugdaw samtang usa ka balay ang nakan-an sa kalayo nga kalit miulbo kagahapon sa buntag sa Langub, Asturias.

Ang kapolisan sa Asturias nakadawat sa maong alarma nianang alas 8 ang takna apan wala kini makatubag kay walay firetruck ang maong lungsod.

Ang Balamban Fire Station maoy daling nakaalarma sa sunog gamit ang duha nila ka firetruck dihang nakadawat sila og pahibalo gikan sa usa ka Raul Enriquez nianang alas 8:18 ug ila dayong girespondihan ug napawong ang kalayo sulod lang sa singko minutos nga gipaubos sa first alarm.

Si SFO4 Socrates Ariosa sa Bureau of Fire Protection sa Balamban miila sa mga tag-iya sa balay nga naugdaw nila ni Winefredo Rosaut, Marina Lugay, Yolina Lugay.

Ang balay nga nakan-an sa kalayo gipanag-iya ni Mark Anthony Lugay.

Ang mga nangaugdaw nga balay usa lang ka pamilyahan ug dibisyon lang ang nakauwang apan pulos na kini konkreto sa ubos samtang ibabaw light materials lang.

Dangtag 20 minutos nagsunod og abot sa nasunogan ang firetruck sa Tuburan ug Toledo apan hingpit nang nakontrolar ang kalayo sa mga sakop sa kabomberohan sa Balamban.

Base sa pasiunang imbestigasyon nasayran nga nagsugod og puot ang aso diha sa kuwarto sa anak nga babaye ni Winefredo og daling mikuyanap ang kalayo sa kisame.

"Diha sa kuwarto sa iyang anak, maoy sulti sa inahan diha nagsugod ang aso kay tiggamitan man kuno ni og katol unya basin wala mapawong" dugang asoy ni Ariosa sa dihang nahinabi sa Banat News kagahapon.

Apan dili pa mokompirmar si Ariosa sa hinungdan sa sunog samtang nagpadayon pa ang imbestigasyon.

Hinuon walay gikatahong naangol atol sa pag-ulbo sa kayo.