Tulis sa VECO, lending firm dunay koneksiyon

Nagduda karon ang kapolisan nga dunay koneksyon ang pagpanulis sa duha ka lending firms niadtong milabay'ng semana sa nauna ng pagpanulis sa duha gihapon ka lending firms sayo sa bulan sa Oktubre ug ang pagtulis sa Veco-Mandaue niadtong milabay'ng adlaw.

Gisusi karon sa Criminal Investigation and Intelligence Branch ang posibilidad nga nakigkunsabo ang grupo sa gipasanginlang tulisan nga si Dindo Ancero ngadto sa grupo sa mga notadong tulisan sa Ozamis nga gipanguluhan ni Jun Halap.

Matud pang Labra sa mga tigbalita nga duna silay mga nadawat nga mga impormasyong nakit-an ang grupo ni Jun Halap sa lungsod sa Bogo ug sa dakbayan sa Talisay.

Ang grupo ni Halap una nang nakapaalarma sa kapolisan dihang mitumaw ang impormasyong miabot sila dinhi sayo ning bulan sa Oktubre.

Si Ancero lumad nga taga Bogo, maoy usa sa mga suspek sa pagtulis sa Land Bank of the Philippines sa maong lungsod ug gitumbok usab nga maoy mitulis sa A1Macro Finance Corporation sa Osmeña Blvd.ug Asialink Finance Corporation sa dalan General Maxilom Avenue sayo ning bulana.

Si Ancero kinsa nadakpan uban ni Jangen Fernandez nga taga Talisay, nadakpan duha ka adlaw pagtulis sa A1 ug Asialink, positibong gitumbok si Ancero sa mga kawani samtang si Fernandez, nailhan sa taga Asialink nga ilang kliyente ug makatulo na nga mi-loan sa ilang kompanya.

Bugtong si Fernandez lang ang nakapiyansa sanglit paghupot ra og armas ang kaso niini ug wala kini itumbok nga kauban gyud ni Ancero atol sa pagtulis apan nagduda ang kapolisan nga posibleng siya maoy nihimo sa surveillance sa maong mga lending firms. Hinuon gipanghimakak kining tanan ni Fernandez.

Niadtong milabay'ng semana, duha ka mga armadong lalaki ang mitulis sa Alano and Sons Finance Corporation sa dalan Escario ug gisunod usab ang igsuon niining kompanya nga G.A. Contryside Finance Corporation sa dalan T.Padilla sa Tejero.

Matud pang Labra ang tanang pamaagi sa pagtulis ning maong mga establisamento pareho ra, apan wala pa matino kung ang mitulis sa duha ka lending firm sa Alano mao rang mga tawhana.

'Because of the circumstances in the mode of operations nga usa ra gyud ka grupo ang nitira, dunay posibilidad nga kauban ra ni sila sa grupo ni Ancero,"asoy pang Labra.

Niadtong milabay'ng gabii, ang Veco-Mandaue gitulis sa wala pa mailhing mga suspek ug nadagit ang P1.7 milyones nga kwarta. Wala pay natumbok ang kapolisan kung si kinsa ang mitulis sa Veco.

Sama sa pagtulis sa Bogo, dunay usa ka babayeng nagpatabang sa gwardiya ug diha-diha mosulod ang mga armadong tulisan, susama kini sa pagtulis sa Veco niadtong milabay'ng gabii.