2 ka Akrho namusil didto sa Argao

Gituohang sakop sa Alpha Kappa Rho nakapusil ug miangol sa duha ka mga hamtong lalaki hinungdan sa pagkalandig sa tambalanan samtang sila nag-inom sa usa ka KTV bar nga nahimutang sa may pantalan sa Poblacion, Argao kagahapon sa alas 12:10 sa kaadlawon.

Segun sa report sa kapolisan nga midangat sa Cebu Provincial Police Office nga selos ang motibo nga hinungdan human ang usa sa duha ka suspek giingon may kuyog nga hinigugma.

Ang suspek sa pagpamusil mao sila si Edward Abear, hingkod, ulitawo, nagpuyo sa Canbanua ug Ruben Manzano Camaura, hingkod, ulitawo ug nagpuyo sa Sitio Suba, Poblacion, Argao.

Ang mga biktima mao sila si Robero Elacion Puerto, 42, minyo ug Gualberto Manila, 48, minyo, ang duha mga residente sa Upper Candabong, Hampang Argao.

Si Puerto anaa karun sa Vicente Sotto Memorial Medical Center human makaangkon og pinusilan sa tuong buko-buko.

Samtang si Manila nalandig sa Izidro Kintanar Memorial Hospital sa Argao human maigo usab sa bukobuko sa wala matinong kalibre sa armas.

Si SPO4 Wilfredo Tauto-an, deputy chief sa Argao Police Station nga nahinabi sa Banat News miingon sa wala pa mahitabo ang insidente usa ka Harold Carillo Kintanar, 21, ulitawo, kauban sa duha ka suspek dunay kaubang hinigugma sa maong KTV bar ug nag-inom og ilimnong makahabog sa pikas lamesa.

Ang duha ka biktima diha usab sa pikas lamesa nag-inom.

Matud ni SPO4 Tauto-an nga nasuko ang duha ka suspek nga gitutokan og tan-aw ang hinigugma ni Kintanar.

Sila si Manzano ug Abear migawas sa KTV ug nanghagit og sukmagay sa duha ka biktima. Apan wala lang tagda sa duha ka biktima ug nagpadayon kini og tan-aw sa TV screen.

Apan dangta'g pila ka minutos mibalik sila si Abear ug Manzano nga may dala nang armas dayong pusil ka tulo ka higayon apan duha ra ka bala ang miigo sa mga biktima samtang ang usa ka bala didto mapunta sa lingkoranan.

Sila si PO2 Elizer Canada ug PO2 Renato Nacaytona daling mitubag sa alarma apan wala na diha ang mga suspek kinsa daling misibat human sa pagpamusil.

Ang kapolisan nagpadayon pa sa ilang gihimong hot pursuit operation.