Tom -Gwen relasyon kuyaw maguba

Posibling maguba ang maayong relasyon tali ni Mayor Tomas Osmeña ug Gobernador Gwendolyn Garcia tungod sa managlahing baruganan niini nga pag-insister nga pulos silang duha maoy adunay katungod nga motudlo og sakop sa board sa Metro Cebu Water District (MCWD).

Si Garcia nakahukom na nga bawion ang appointing power ni Osmeña tungod kay wala makaabot og 75 porsiyento ang mga konsumidor sa MCWD gikan sa siyudad sa Sugbo nga maoy nalatid sa charter niini.

Apan giklaro kagahapon ni Osmeña nga dili niya kini ihatag tungod kay pabiling gibarugan sa mayor nga siya gihapon ang adunay gahum niini ilabi na kay gihimo ang maong balaod dihang sakop pa sa probinsya sa Sugbo ang dakbayan ug labaw sa tanan mayoriya gihapon ang 64 porsiyento nga molupyo sa dakbayan nga konsumidor sa MCWD.

Tungod niini, nanghinaot si Osmeña nga dili ma-apektuhan ang ilang maayong relasyon sa gobernador may labot ning maong isyu ug iyang gihagit ang korte nga maoy moresolbar ning maong isyu.

Kini tungod kay nabalaka ang mayor sa mamahimo unyang linugdangan nga moresulta sa pagka paralesar sa operasyon sa MCWD sa higayon nga motudlo siya og bag-ong sakop sa board sa MCWD ingon man si Garcia sa higayon nga mapupos na unya ang termino nila ni Atty. Rico Tautho ug Ruben dela Cerna karong Disyembre 31.

We have political solution to this magsabot nalang ta, or make Cebu city part of the province. On that way there's no more dispute already kay gobernador na tanan," si Osmeña nagkanayon.

Si Osmeña nangandam na sa iyang mga bag-ong nominees nga sila si Atty. Chito Teleron ug Engr. Leo Pacaña nga maoy itudlong hulip kang Tautho ug dela Cerna.

Kini human masuta nga dili kwalipikado sa maong posisyon ang igsuon sa gobernador nga si Capitol consultant Pablo John Garcia tungod kay atua man kini marehistro sa lungsod sa Barili ug gikinahanglan nga rehistrado sa franchise area ang matudlong sakop sa MCWD board.