P100 mil na ang ganti vs drayber miluba's enforcer

Gikan sa P50 mil gipatas-an ngadto sa P100 mil ang ganti nga gitanyag ni Mayor Tomas Osmeña ngadto sa makahatag og impormasyon nga moresulta sa pagkasikop sa PUJ drayber nga midunggab sa traffic enforcer niadtong Biyernes sa buntag.

Atol sa press conference kagahapon sa buntag giklaro sa mayor nga tuyo ug tumong niya ning iyang pagpadako sa gitanyag nga ganti aron maghatag kini og pahimangno batok niadtong mga badlongong PUJ drayber nga kusog magpaugat sa lagda sa trapiko ug mosukol pa kun dakpon sa mga traffic enforcer.

Hangtod karon pabiling gawasnon ang PUJ drayber nga si Wenelito Econas, 33, taga Sitio Burlas, Lagtang Talisay nga maoy gituohang nagdunggab sa traffic enforcer nga si Danilo dela Peña dihang gidakop tungod sa kalapasan sa lagda sa trapiko sa may N. Bacalso Avenue.

Samtang nagpabilin ang shoot order ni Osmeña batok sa maong drayber kun mosukol kini sa himuong pag-aresto sa kapolisan kaniya.

Nunot niini, gipahibalo sa mayor nga iyang ipatuman ang pag-isyu og armas sa mga traffic enforcer panahon sa ilang duty.

Kini aron dunay magamit pagpanalipod sa ilang kaugalingon ang maong mga traffic enforcer batok sa mga abusado ug badlongong drayber nga ilang madakpan nga mohimo og kalapasan sa lagda sa trapiko.

Apan giklaro sa mayor nga kadto lang mga traffic enforcer nga makapasar sa psychological test ug mapaubos sa mga seminar ang tugutan niyang makadala og armas.

Andam hinuon ang City Hall mopalit ug mo-isyo ug mga armas nga magamit unya sa mga traffic enforcer.