65-anyos nagpusil sa agtang

Usa ka 65-anyos nga lalaki mipusil sa iyang kaugalingon hinungdan sa iyang kamatayon kagahapon sa kaadlawon.

Patay nang nakit-an si Reymundo Cabreros Oliveros, 65, human magpusil sa agtang gamit ang .38 kalibre nga rebolber sulod sa iyang balay sa Sangi Road, Pajo, Lapu-Lapu.

Gituohan sa kapolisan nga gumikan sa sakit nga gihambin ni Oliveros maoy hinungdan sa paghikog niini.

Si Viviana Oliveros miasoy ngadto kang PO3 Manolito Abellanosa sa Homicide Section sa Lapu-Lapu nga misulod sa lawak ang iyang bana ug nanirado kini sa pultahan ug pipila ka gutlo kalit lang milanog ang sipa nga buto.

Sa dihang ilang giablihan ang pultahan napalgan na lang nga nagbuy-od sa kaugalingong dugo si Reymundo.

Atol sa paghiling sa mga sakop sa Homicide Section nasuta nga adunay samad pinusilan sa iyang agtang ang biktima.

Matud pa ni Viviana nga duna nay daghang sakit nga gihambin si Reymundo.

Gisuwayan pagdala sa Mactan Doctor's Hospital si Reymundo apan gideklarar kini nga dead on arrival. Walay nakitang foul play ang kapolisan sa kamatayon ni Reymundo.