Brgy. kapitan sa Buhisan girekomendar nga pakasuhan

Gi-rekomendar sa Ombudsman Visayas ang pagpasaka og kasong criminal batok sa barangay kapitan sa Buhisan siyudad sa Sugbo nga si Rustica Asid.

Kini human gi-aprobahan ni Ombudsman Director Virginia Palanca Santiago ang resulta sa evaluation report niadtong petsa 20 sa Hulyo nga gihulagway nga dunay igong basihanan ang pag-upgrade sa maong reklamo ngadto sa kasong criminal tungod sa gipakitang misconduct ug dishonesty sa kapitan sa Buhisan.

May labot kini sa reklamo ni Buhisan barangay councilor Eutiquio Tabar nga nagtumbok kang kapitan Asid nga mibaligya sa dump truck nga gipanag-iya sa barangay nga wala masubay sa hustong proseso ug labaw sa tanan gibulsa pa ang halin niini.

Ang affidavit sa saksi ni Tabar nga si Diosdado Corpuz nga maoy nagsilbing hepe sa tanod sa panahon ni kanhi barangay kapitan Menandro Diola niadtong tuig 2004 maoy usa sa nakapalig-on sa maong reklamo.

Sigun sa pamahayag ni Corpuz iyahang nakit-an si Julito Cuizon, maintenance personnel sa barangay nga maoy nag-chop chop sa naguba nga dump truck sa barangay nga gisugong ipabaligya sa kapitan.

Apan kalit lang niduso og laing affidavit si Corpuz nga nibakwi sa tanan niyang mga pasangil batok sa kapitan apan nadiskobrehan sa Ombudsman nga gimaniobra ang maong affidavit ug dili kini tinuoray nga pirma sa saksi.

Apan dugang pang mga documentary evidence ang gi-presentar ni Tabar ngadto sa Ombudsman hinungdan nga nakakita og igong basihan ang Ombudsman nga isaka kini ngadto sa kasong kriminal ang reklamo batok sa kapitan.

Nasayran nga gitubag na ni kapitan Asid ang maong reklamo ug gibutyag niini nga guba-on ug gihimulbolan na ang maong dump truck nga naglubog lang sa basketball court sa ilang barangay ug dili na magamit apan wala kini hatagi og gibug-aton sa mga imbestigador.