Cebuana nasakit sa Saudi papaulion

Giawhag sa konseho sa siyudad sa Sugbo ang Department of Foreign Affairs (DFA) ingon man ang Philippine Overseas Employment Administration (POEA) nga mohimo og lakang aron makapauli sa labing daling panahon dinhi sa Pilipinas ang Sugbuanong OFW nga si Geraldine Tampus Velasquez nga taga Pit-os siyudad sa Sugbo nga gikustodiya karon sa kagamhanan sa Saudi Arabia ug nagmasakiton.

Sigun sa nahipos nga impormasiyon ni Konsehal Edgardo Labella gikustodiya si Velasquez sa kagamhanan sa Saudi Arabia human kini molayas sa iyang employer nga Samama Company for Operation and Management.

Ang igsuon na ni Geraldine nga si Gina Auman maoy misumbong ngadto kang Labella kabahin sa mapait nga kahimtang karon sa iyang igsuon didto sa Saudi.

Gisumbong ni Auman nga kaniadto pa siya nagduda sa pagkabutang sa iyang igsuon sa maong nasud human wala na makahatag kaniya og balita sa iyang igsoon ang recruitment agency niini nga SGA Shahara Manpower Services.

Nahibaw-an karong bag-o nga ang Al Awa El International Manpower Inc. maoy tinuoray nga recruitment agency ni Geraldine ug didto pa nahibaw-i nga nabali ang tuong tiil niini sa pag-ambak sa bintana aron molayas sa iyang abusadong employer.

Tungod niini, mopasar og resolosyon si Labella nga mag-awhag sa DFA, POEA ug OWWA nga mangita og lakang aron makapauli sa labing daling panahon ang masakiton nga Sugbuanong OFW.