Ginang konbikto tungod sa drugas

Gihukman ni Regional Trial Court Branch 58 Judge Gabriel Ingles nga mabilanggo sulod sa 12 ngadto sa 15 ka tuig ug pabayron og P300 mil nga multa ang usa ka 40-anyos nga ginang tungod sa paghupot og ginadiling drugas.

Si Myrna Chan Velasquez, usa ka labandera nga taga Lawis, Lorega-San Miguel niining dakbayan nasakmitan og usa ka paketeng shabu niadtong Oktobre 2005 sa gipahigayong preventive patrol sa mga polis sa Parian Police Station batok sa ilegal nga kalihukan diha sa Lorega-San Miguel.

Si PO2 Achiles Sanchez Jr., usa sa misikop ni Velasquez mibutyag sa korte nga si Velasquez naglakaw paingon sa ilang nahimutangan sa ilang pagpahigayon og patrolya.

Adunay gikumkom sa tuong kamot si Velasquez ug dihang nakabantay kini nga mga polis ang iyang makatagbo gilabay ang butang nga gikumkom niini ug misuway kini pagbalik sa iyang gigikanan aron paglikay sa mga otoridad.

Apan nababagan sa mga polis si Velasquez ug ang gamay'ng plastik nga gilabay niini gipunit ni PO2 Raymundo Sapatan kinsa kuyog usab sa nahisgutang patrolya.

Si Velasquez mihimakak sa korte sa mga pasangil batok kaniya ug nagkanayon nga planted ang nakuhang ebidensiya apan wala kini hatagi og gibug-aton sa korte.

Base sa hukom ni Ingles nga kasagaran nga buhaton sa mga tawo nga naghupot og ilegal nga butang mao ang paglabay niini aron dili kini masakpan.