Polis nga wa pa drug-test ipalabay gawas sa Talisay

Si Bise Mayor Aberdovey Belleza, tsirman sa kahapsay ug kalinaw sa Talisay, desidido na nga mopalagpot gikan sa siyudad sa upat ka polis kinsa wala magpa-drug test.

Kahinumduman nga sa milabay'ng semana ang siyudad mipahigayon og surpresang drug test sa kapolisan para pagpiho sa mga taho nga adunay mga polis nga mogamit og ginadiling drugas.

Si Belleza nagkanayon kagahapon sa Banat News nga gipadalhan niya og memorandum si Police Superintendent Romeo Perigo, hepe sa kapolisan sa siyudad para mohatag og rason nganong ang upat ka polis wala magpa- drugtest.

Gibutyag ni Belleza nga usa sa upat ka polis nagkasumpaki ang mga katarungan nga mirason og nga nagkalibang unya mirason usab nga adunay court hearing.

Matud ni Belleza nga para sa pagtangtang sa pagduda ug mamahimong balido ang rason sa maong polis gipangayoan niya si Perigo og dokumento pagmatuod nga aduna kini appearance sa korte.

Gitataw ni Belleza nga ang komitiba sa kahapsay ug kalinaw morekomendar sa pagpalagpot gikan sa siyudad sa maong mga polis kung wala gyud kini mga balidong rason.

"Kung ma-found out sa committee nga dili makatarunganon mo-recommend man ko og pa-relieve ining upat ka tawo, wala silay luna dinhi sa Talisay dili sila motuo sa LGU kinsa may ilang tuohan?" ni Belleza pa.

Tulo ka adlaw ang LGU mipahigayon og drug test sa kapolisan sa siyudad para mahatagan usab og konsiderasyon ang wala dayon makapa-drug test.

Si Perigo sa iyang bahin sa pakighinabi niini sa Banat News kagahapon sa buntag mibutyag nga usa sa upat ka polis ang wala mohatag sa rason nganong wala kini magpa-drug test.