Tulisang polis ilhan na

Duna nay suspek ang kapolisan sa pagtulis ug pagpatay sa duha ka tawo diha sa usa ka lending firm sa dalan T. Padilla extension sa barangay Tejero ning dakbayan.

Si Supt. Melvin Gayotin ang acting director sa Cebu City Police Office mitug-an nga duna nay polis nga ilang gidudahang maoy mitulis sa PRH Lending Investments Incorporated niadtong September 9 ning tuiga diin ang tag-iyang si Pilar Hernandez, 62, ug sekretaryang si Wevina Pancho gipatay.

Gidudahang nakadala og gibana-banang P700 mil ngadto sa usa ka milyon ang suspek nga gituohang polis sanglit sagad sa mga kliyente sa PRH mga polis ra ug ang armas nga gigamit sa suspek kalibre 9mm.

Matud pang Gayotin nga ang maong polis nga ilang gidudahan nasakop gihapon dinhi sa Police Regional Office 7 apan midumili sa pagbutyag kung unsa nga unit ug kung asa kini nadestino.

Ang maong polis gidudahan base palang sa sirkumstansya apan wala pay matumbok ang dugang impormasyon sa kalambigitan niini sa kaso gawas lang nga utangan ang maong polis kang Hernandez.

Dugang pa ni Gayotin nga mismong ang testigo nga nakakita kaniya nagkanayon nga dunay pagkamay-ong sa tawong labing ulahing nakit-an niyang bisita diha sa PRH niadtong pila ka minutos sa wala pa ang hitabo.

Ang pamilya sa mga biktima pabiling misalig sa kapabilidad sa CCPO sa pag-imbestigar sa kaso apan miklaro nga kun di sila matagbaw sa dagan niini modangop sila og laing investigating units.