Waterfront police station maoy dagha'g kaso sa tulis, sunod PS5

Ang hurisdiksyon sa Waterfront police station (PS3) ug Carbon Police station (PS5) maoy dunay labing daghang insidente sa pagpanulis sulod sa tulo ka semanang milabay base sa statistics sa Cebu City Police Office operations section.

Ang Waterfront police station dunay natalang onse ka insidente sa pagpanulis samtang lima ang sa Carbon police station sunod ang Talamban police station (PS8).

Nag-una usab ang Carbon police station sa dunay daghang insidente sa pagpanglabni nga mitala og napulo ka insidente sunod ang Waterfront police station, ang PS5 nag-una usab nga nakatala og pagpanguot.

Samtang sa modus nga 'tiyempo' kun lipat-lipat, ang Pardo police station (PS7) ug Guadalupe police station (PS9) maoy nag-una sa talaan sa daghang insidente sa pagpangawat.

Ang maong Comparative Crime Statistics on Street Crimes nagsugod sa petsa 4 hangtud sa 24 ning bulana.

Apan base sa mga insidente sayo ning bulana namatikdan nga mimenus ang mga insidente niining maong mga krimen. Niadtong Sept.4 ngadto sa Sept.10 dunay 16 ka insidente sa tulis nga natala apan pagka-Sept.18 hangtud sa Sept.24 mikunhod kini ngadto sa unom nalang ka insidente.

Lakip sa mius-os ang insidente mao ang snatching ug lungkab ug gituuhang ang pag-usab sa papel sa mga Field Training Program trainees og paagi sa pagpatrolya sa kapolisan sukad niadtong mahitabo ang pagpatay sa usa ka tinun-ang biktima sa tulis maoy hinungdan sa dakong kausaban.

Apan kun mius-os ang insidente sa tulis ug lungkab misaka usab ang mga kaso sa pagpanguot.