Ang biktima mao si Allan Gonzales, 49, minyo ug nagpuyo sa Cambanay, Lapulapu, samtang ang suspetsado mao si Benedicto Durano, 40, minyo nga nagpuyo sa maong dapit ug nag-abang lamang sa yuta ni Gonzales.
Base sa imbestigasyon ni SPO1 Rodrigo Roble Jr. sa Danao Police Station nasuta nga si Durano nasuko sa dihang ang punoan sa mangga nga miturok sa yuta ni Gonzales ang mga sanga niini milapas na sa iyang yuta nga giabangan usab niya.
Misamot ang kasuko ni Durano sa dihang mipupo si Gonzales ug wala mabahini si Durano sa bunga sa mangga, hinungdan nga mikuha kini og armas dayong pusil ni Gonzales.
Si Gonzales nga naigo sa iyang dapidapi ug sa tuong kamot gidala sa Danao District Hospital ug gibalhin sa Vicente Sotto Memorial Medical Center, samtang si Durano pormal nga misurender sa kapolisan sa Danao.
Si Durano pasakaan og kasong frustrated murder sa kapolisan sa Danao ngadto sa piskaliya, samtang nagpabilin kini nga nabilanggo.