Ang gilugos mao si Jenny (dili tinuod nga ngan), 14, nagpuyo sa maong dapit ug tinun-an sa sekundarya sa Talamban, ning dakbayan.
Samtang ang milugos kaniya mao si Willy (tinuod nga ngalan gipugngan) 24, ulitawo nga anaa manimuyo sa balay sa biktima.
Base sa pamahayag ni PO3 Nolberto Cejas sa Consolacion Police Station nga personal nga gidala sa buhatan sa kapolisan si Willy sa mga ginikanan ni Jenny kagahapon sa kaadlawon ug gitanggong gumikan sa paglugos niini sa iyang ig-agaw.
Matud pa sa mga ginikanan ilang gisagop si Willy gumikan kay ilo na kini sa mga ginikanan, apan wala sila magdahum nga iyang unayon ang iyang ig-agaw sa paglugos.
Sumala pa sa inahan nga human misumbong kaniya si Jenny sa binuhatan sa iyang ig-agaw wala maglangay ang magtiayon ilang gisikop si Willy ug gidala sa kapolisan sa Consolacion.
Si Jenny miasoy nga kanunay na kining buhaton ni Willy kaniya dala ang hulga nga patyon kun motug-an sa iyang mga ginikanan.
Si Willy usab hugot nga mihimakak sa maong akusasyon batok kaniya ug miangkon nga igo lamang niya gihikaphikap ang mga importanteng bahin sa lawas sa iyang ig-agaw, apan si Jenny hugot nga mipadayag nga nakuha na siya ni Willy.
Gumikan niini, pasakaan og kasong pagpanglugos si Willy sa mga sakop sa Women's Desk sa Consolacion human sa ipahigayong medical check-up sa biktima.