alisay City magsabot sa NFA sa suplay sa ilang bugas

Kagamhanan sa Talisay moluwat og kasabotan tali sa National Food Authority (NFA) kabahin sa rice loan para pagpangandam sa kalamidad nga posibleng moigo sama sa bagyo niining mga buwana ug sa sunod nga mga buwan.

Ang konseho sa siyudad mihatag og pagtugot ni Mayor Socrates Fernandez nga mogama og Memorandum of Agreement (MOA) tali sa NFA para makakompra og bugas ang dakbayan nga ipundo ubos sa NFA loan program.

Ang pundong gamiton sa pagbayad sa mga bugas nga paliton sa siyudad maggikan sa existing nga singko porsiyentong Calamity ug 20 porsiyentong development funds.

Kahinumduman nga ang dakbayan bag-o lang naigo sa kalamidad diin adunay sobra sa 200 ka pamilya ang nawagtangan og mga balay tungod sa pagkabanlas sa dagkong bawod.

Ang dakbayan mihatag og bugas sa mga biktima nga maoy una nilang gikinahanglan.

Si Konsehal Arturo Bas kinsa tsirman sa Committee on Appropriation, Budget and Accounts nagkanayon nga angayan gyud nga ang dakbayan magpundo daan para sa mga unang panginahanglanon mentras wala pay laing kalamidad nga miigo.

Ang NFA milusad sa ilang expanded rice loan program ngadto sa mga local government unit (LGU) para masagubang ang unang gikinahanglan sa tagsa-tagsa nila ka mga lumulupyo panahon sa emerhensiya.