2 ka plois gibinaklid, gipusposan sa ulo

Duha ka mga polis nga igo rang mipakgang sa nanag-away nga managsilingan diha sa sitio Back Japer, Quiot ning dakbayan ang nangabun-og human gibinaklid ug gipuspusan sa ulo sa mga tawong miinterbiner kanila niadtong Domingo sa hapon.

Ang mga biktima giilang sila si PO1 Herbert Dapitanon ug PO1 Sedric Macalisag nga pulos mga sakop sa Maritime Police dinhi sa Sugbo.

Duha ka mga manag-amahan ang gidakop sa duha human sa karambola niadtong tungura ug giilang sila si Francis Pajares ug anak niining si Jonathan Pajares, 19.

Sumala pang PO2 Edmon Tiempo sa Pardo Police Station nga ang mga biktima miresponde sa away nga gikalambigitan sa managsuong sila si Fely Alcos ug Sergio Alcos niadtong tungura.

Si Macalisag gikatahong nagpuyo diha sa maong lugar ug iya rang mga silingan ang mga nanag-away ug ang duha ka gipangdakop.

Apan kalit lang nga miinterbiner ang mga silingan kanila lakip na ang manag-amahang Pajares diin gikatahong ang amahang Pajares milubag sa abaga ni Macalisag ug midumili sa pagpa-aresto, samtang si Jonathan gikatahong mihampak og wala matinong butang diha sa walang bahin sa ulo ni PO1 Dapitanon hinungdan sa dakong samad nga naangkon niini.

Nianang tungora napugos ang duha ka polis sa paggamit og pwersa hinungdan sa pagkadakop sa manag-amahan ug gidala sa Pardo police station.

Kagahapon sa buntag matud pang Tiempo nga nagkasabot ang duha ka partido sa pag-inuliay sa ilang buot ug gipabuhian ang duha ka gidakop.