Gikan nang-disko gipusil

Patay ang usa ka tawo nga giatangan sa silingan sa pagpauli gikan sa disco sa miaging kaadlawon sa sitio Maanao, bukirang bahin sa Tabok, Tabuelan, Cebu.

Ang namatay mao si Jumeler Cole Daligidig, 20, ulitawo, nga kanhi pianesta nga nagpuyo sa maong dapit.

Ang nagpusil sa biktima mao ang wala mailhing lalaki kinsa dali usab kaayong nakapahilayo sa maong dapit.

Si PO1 Jojo Himalagan sa kapolisan sa nahisgotang lungsod nga gikahinabi sa Banat News miingon nga nakakita og lalis sa diskohan ang biktima.

Dihang migawas kini sa diskohan kay mipalit og sigarilyo sa tindahan kalit lang kining gipusil sa wala mailhing mamumuno nga lalaki.

Dugang pa ni PO1 Himalagan nga nakabaton ang biktima og samad pinusilan sa ilong nga nalubong ang bala sa nawong ug namatay.

Si SPO1 Ramon Montecalvo ug PO3 Wilson Abot sa kapolisan sa maong lungsod maoy nakatubag sa maong alarma ang padayon nga naghimo sa ilang imbestigasyon.