Neri pakig-kitaan og balik ni Tomas

Subling makigtagbo si Mayor Tomas Osmeña ngadto kang Secretary Romulo Neri sa National Development Authority (NEDA) karong buntag aron ipadayon ang pagkwestyon sa gihulagway niining dili makiangayon nga pag-aprobar sa kontrata pag-supply og mahal nga tubig sa Ayala-Stateland Consortium ngadto sa Metro Cebu Water District (MCWD).

Apan gitug-an sa mayor nga dili si Neri ang personal nga makig-atubang kaniya kun dili ang usa ka technical staff niini nga maoy nasuhito sa bag-ohay lang gi-aprobahan nga transaksiyon.

Matud ni Osmeña napugos og takda ang maong meeting gumikan sa walay hunong niya nga pagreklamo batok sa maong natigayon nga transaksiyon nga gikabalak-an sa mayor nga makabangkarota sa MCWD sa umaabot nga mga katuigan ug moresulta pa unya sa pagmahal sa presyo sa tubig nga i-suplay sa MCWD ngadto sa mga konsumidor niini dinhi sa Metro Cebu.

Giapelar sa mayor ngadto kang Neri nga mohimo og subling pagtuon sa maong natigayon nga transaksyon tungod kay ang NEDA man maoy katapusang mo-aprobar sa maong natigayon nga transaksyon una pa mahingpit nga sirado na man ang transaksyon.

Una nang nakigtakda si Osmeña og meeting ni Neri sa milabay'ng mga adlaw apan wala kini mahinayon hinungdan nga subli kining gi-schedule karong adlawa.