Taxi driver miuli sa nabiyaang cellphone sa CICC consultant

Laing buotang taxi driver nangunay sa pag-turn over didto sa Cebu City Hall kagahapon sa buntag sa usa ka mahalong cellphone nga nahabilin sa iyang gimaneho nga sakyanan nga gipanag-iya sa usa ka consultant sa Cebu International Convention Center (CICC).

Ang taxi driver naila nga si Ernesto Aroma, lumad nga molupyo dinhi sa dakbayan sa Sugbo, nangunay kini sa paghatod sa buhatan ni Mayor Tomas Osmeña sa mahalong cellphone nga gipanag-iya sa usa ka Engr. Diosdado Ejercito Jr. mechanical consultant sa mechanical sa nagpadayong konstruksyon sa CICC.

Matud ni Aroma nga nabiyaan sa iyang pasahero diha sa iyang sakyanan ang maong cellphone sa pagkanaug niini kagahapon sa buntag padulong sa iyang trabahoan hinungdan nga dali dayon niya kining gihatod sa City Hall.

Si Aroma nakahunahuna nga adto kini itugyan sa City Hall aron mauli ang maong butang ngadto sa nanag-iya niini human daghan nang mga kaubanan niyang mga driver ang mitugyan sa mga nabiyaang butang ug kwarta sa ilang pasahero sa City Hall ug nauli gyud kini ngadto sa tinuoray'ng tag-iya.

Si Engr. Ejercito mao gyuy nangunay sa pagkuha sa mao niyang cellphone sa City Hall kagahapon ug iyang gipasalamatan ang maong buotang taxi driver dungan ang paghatag og gamay'ng salapi agi og pagpasalamat sa pagkamatinud-anon niini.

Si Osmeña sa iyang bahin mihangop ug mipasalamat sa maong taxi driver tungod sa gipakita niining pagka matinud-anon.