Mass resignation sa PNP gipakagamay lang

Gipakagamay ni Cebu City Police Office acting director Melvin Gayotin ang mga hungihong nga molusad og mass resignation ang kapolisan sa nasud tungod kay wala na sila makauyon sa pamunoan ni Presidente Gloria Arroyo.

Matud pang Gayotin nga wala siya'y nadawat nga susama nianang hulgaa dinhi sa iyang ginsakupan tungod kay loyal sa administrasyon ang CCPO.

Giklaro ni Gayotin nga wala magpasabot nga loyal ang iyang ginsakupan ngadto sa usa lang ka personalidad sama kang Arroyo kundili sa Konstitusyon ug sa administrasyon isip magbalantay sa katawhan.

Matud pang Gayotin nga di maayong tan-awon nga ang usa ka sakop sa unipormadong organisasyon sama sa kapolisan ug sa militar nga magpadayag-dayag og disgusto ngadto sa pamunoan sanglit isip sakop sa ilang organisasyon angayang magbaton sila og respeto ug pagsunod sa mga lagda.

"It is better to go and resign if you can't go along with the system, because the system provides all the policies you should do, this is a uniformed service and you are governed by these policies," asoy pang Gayotin.

Matud pa niya nga ang susamang mga kalihukan adto ra gyud mahitabo sa kauluhan apan giangkon niyang dinhi sa Sugbo duna gihapoy pamolitika sulod sa kapolisan apan menus kaayo kun itandi didto.