Ang aksidente nahitabo alas 11 pasado ang takna sa miaging Huwebes sa gabii sa national road, Bachawan, Daanbantayan.
Ang mga biktima mao sila si Richard Gesolan, 33, minyo nga taga Bateriya, Daanbantayan, Segunda Potot, 68, minyo ug Luz Casas, 53, minyo nga pulos taga Bachawan sa nahisgotang lungsod.
Nagluwan ang mga biktima og traysikol nga gimaneho ni Ronnie Optana, 23, taga San Vicente, Poblacion sa lungsod sa Daanbantayan.
Si Ruben Armenton, hingkod ang panuigon, minyo nga taga Lamentac Sur, Medellin mao usab ang nagmaneho sa D Rough Rider bus nga nagdala sa plate number GWB 134 nga maoy gikasungag sa traysikol nga giluwanan sa mga biktima.
Si Armenton giditiner karon sa Daanbantayan Police Station nga boluntaryo kining mitahan sa iyang kaugalingon human sa aksidente.
Si PO1 Ryan Castro sa traffic section sa kapolisan sa nahisgotang lungsod nga gikahinabi sa Banat News miingon nga gikan sa dakbayan sa Sugbo ang D Rough Rider nga gimaneho ni Armenton.
Sa paghidangat gayod sa kurbadahong bahin sa maong dapit kalit lang nga gikasungag sa maong sakyanan ang traysikol nga giluwanan sa mga biktima.
Ang mga biktima nga gidali pagdala sa Bantayan District Hospital gibalhin sa Perpetual Soccour Hospital sa dakbayan sa Sugbo ug anaa kini sa higpit nga pag-atiman sa mga doktor.