Komitiba ni Macias gisaway ni Sanchez

Gisaway ni Bise-Gobernador Gregorio Sanchez Jr. ang pag-aprobar sa House Committee on Local Government sa balaudnon nga gitawag og Sugbuak Bills tumong sa pagbahin-bahin sa lalawigan sa Sugbo.

Matud pa ni Sanchez nga dili makiangayun ang lakang sa komitiba sanglit ang tsirman niini nga si Kongresista Emilio Macias sa lalawigan sa Negros Oriental daan na nga pabor sa balaudnon.

Hinoon malaumon si Sanchez nga masangit sa plenary ang report sa komitiba sanglit nasayud na ang kadaghanan sa mga kongresista nga supak ang mga Sugbuanon sa pagbuak-buak sa Sugbo.

Sa iyang bahin, si Mandaue City Mayor Thadeo Ouano nikwestiyon sa gihimo sa komitiba sanglit dili mga Sugbuanon ang nihimo sa desisyon.

Sila si Kongresista Antonio Cuenco ug Raul del Mar nga pulos sa dakbayan sa Sugbo mao lang ang mga Sugbuanon nga sakop sa komitiba ni Macias.

Matud pa ni Ouano nga dili kaayo magtagad sila si Cuenco ug del Mar sa maong isyu sanglit dili man sila taga probinsiya.

Sama kang Sanchez, naglaum si Ouano nga masangit gihapon sa unahan ilabi na sa Senado ang maong balaudnon.

Si Ouano supak sa pagbuak-buak sa Sugbo ug nisugyot nga dugangan na lang ang distrito ug ang gidaghanon sa mga kongresista sa Sugbo.

Sila si Kongresista Simeon Kintanar sa ikaduhang distrito, Antonio Yapha Jr. sa ikatulong distrito ug Clavel Asas-Martinez sa ikaupat nga distrito ang nagtinguha nga mahimong buwag nga probinsiya ang tagsatagsa nila ka distrito.

Si Kintanar nagtinguha sa paghimo sa Cebu del Sur, si Yapha sa Cebu Occidental ug Martinez sa Cebu del Norte.