Atol sa press conference kagahapon sa udto gibutyag ni Mayor Tomas Osmeña nga alang kaniya insakto ang nakab-ot nga hukom sa board paghulip kang Yap sa maong posisyon.
Alang kang Osmeña nagpakita lang nga dili matinud-anon ang maong opisyal dihang nagbuotbuot kini sa pagpahigayon og mga transaksyon sa maong airport nga walay kasayuran ug pagtugot sa MCIAA board.
Ang board nakahukom nga taktakon si Yap sa posisyon human gi-isnab niini ang hukom sa board nga nagpahamtang sa preventive suspension batok kaniya.
Ang MCIAA board mipatuman og preventive suspension kang Yap gumikan sa natimahoan niini nga "over-price" nga pagpamalit og mga ekipo ug ubang kagamitan sa airport, ug ang gikataho nga kwestyonabling pag-award niini sa P110 nga proyekto sa maong airport ngadto sa ARN builders ug ang giingong pagsumiter niini ug gi-tamper nga kopya sa charter ngadto sa Civil Service Commission (CSC).
Sila si City Planning Officer Nigel Paul Villarete ug MCIA public affairs division chief Ahmed Cuizon ang nagtinguhang mahimong general manager sa airport nga gidumala karon ni OC Romeo Bersonda.