Ang kapin usa ka gatos ka mga drayber kansang mini nga ID sa CITOM gisakmit sa mga tinugyanan sa maong ahensiya pulos nagbiyahian sa rota sa Lahug, matud pa ni Atty. Rico Abellanosa sa Citom.
Hinuon miingon si Abellanosa nga dili lang nila pasakaan og kaso sa hukmanan ang maong mga drayber sa Public Utility Jeepneys (PUJ) tungod sa katarungan niining inosente kuno sila sa maong hitabo.
Apan iyang gidapit ang tanang nasakpan sa paglukat og clearance sa buhatan sa Citom aron nga makalikay sila sa silot nga ipahamtang kanila.
Midugang si Abellanosa nga wala pa silay nadakpang drayber nga nagtangkil og mini nga CItom ID gikan sa mga rota.
Gani nagkanayon si Abellanosa nga kon tinuod nga wala sila masayod nga mini ang gilukat nilang ID, mas alkanse sila kay kon adto sila molukat niini sa buhatan sa Citom, P80 ray ilang bayran, samtang ang mini, tag P300.
Human masakpi kining 110 ka mga drayber nga may mining ID, nagtuo si Abellanosa nga wala nay lain pang mga drayber nga nagbaton niining palsipikadong ID.