BARKO GIKAWAT

Floating hotel and casino nga Philippine Dream nga buot unta mosibat dinhi sa Sugbo gi-hold sa mga sakop sa Bureau of Customs samtang giguroy na unta sa kalawran sa lungsod sa Liloan.

Base sa initial nga imbestigasyon ni Capt. Isidro Estrera, District Commander sa ESS Customs Police sa Cebu nga human nila masayri nga giguyod na sa usa ka tagboat ang barkong Philippine Dream nga kanhi nahimutang sa pantalan sa Pusok, Lapu-Lapu, ang mga operatiba sa Customs Intelligence and Investigation Service, ESS sa Customs Sub-Port of Mactan migukod niini hangtod sa kalawran sa Liloan.

Matud pa ni Estrera nga gumikan sa impormasyon nga ang maong barko gibaligya na sa laing kompaniya kini ilang gigukod gumikan kay aduna kini obligasyon ngadto sa adwana hinungdan sa pagluwat ni Cebu District Collector Ricardo Belmonte og hold order batok sa maong barko.

Atol sa pakighinabi sa Banat News kang Belmonte kini mipadayag nga ila pa karong gisusi ang kamatuoran nga ang Philippine Dream gibaligya na ug kini nagkinahanglan og konpirmasyon.

Matud pa ni Belmonte nga ang maong barko dili bastabastang mabaligya gumikan kay pag-abot niini niadtong tuig 1995 dinhi sa Sugbo exempted kini sa duties and taxes isip usa ka insentibo nga gihatag sa Board of Investments (BOI) ug ang maong kasabutan dili kini transferable ngadto sa buot mopalit sa maong barko.

Kun kinsa ang makapalit niini kinahanglan nga mobayad kini sa duties and taxes nga singlon sa BOC hinungdan nga kini temporaryong gipugngan alang sa dugang pakisusi sa maong status sa barko, matud pa ni Belmonte.

Kahinumduman nga sa panahon ni kanhi Cebu Customs District Collector David Odilao Jr., ang Philippine Dream gikan sa nasud sa Hong Kong nga gipanag-iya sa Lai Sun Development Company ug gidala kini sa Sugbo ubos sa MEPZA nga nagsilbing floating hotel and casino hinungdan sa pag-exempt niini sa bayranan nga buhis sa gobyerno.

Hangtod karon padayon pa ang mga sakop sa customs sa ilang gihimong imbestigasyon sa legalidad sa pagbiya niini diha sa dakbayan sa Lapu-Lapu ug kasamtangan kini nga gigaid didto sa kadagatan sa Liloan.