Pamilya sa gitulis, gipatay mitanyag P100 mil nga reward

Pamilya sa negosyante nga gitulis ug gipatay sa iyang security guard diha sa Tabunok dakbayan sa Talisay mohatag og P100 mil nga salapi sa makatudlo sa mga suspetsado aron kini masikop.

Si Bise Mayor Aberdovey Belleza mibutyag kagahapon sa pakighinabi niini sa Banat News nga miduol kaniya ang asawa ni Jerry Ong nga si Elma ug nangayo og tabang nga masulbad ang kaso sa iyang bana.

Matud ni Belleza nga si Elma mohatag sa nahisgutang salapi sa tawo nga makasikop o makatudlo sa mga suspetsado.

Kahinumduman nga si Ong gipusil diha sa sulod sa iyang opisina niadtong Hunyo 26 niining tuiga sa buntag ug nakaangkon kini og samad pinusilan sa tuong bahin sa mata ug tangkugo ug ang bala miungot sa ulo niini nga gituohan nga maoy hinungdan sa iyang kamatayon.

Ang mga suspetsado giila nga si Ferdinand Anjolario ug Mateo Repuela, mga security guard nga gikuha ni Ong gikan sa Melgos Security Agency sa Toledo.

Base sa imbestigasyon sa kapolisan sa Talisay nga tulis ang motibo sa maong hitabo tungod kay gidala sa duha ang P200 mil nga salapi, .45 kalibre ug 9mm nga armas ni Ong.

Matud ni Belleza nga si Anjolario upat pa lang kini ka adlaw nga nagserbisyo ni Ong ug nakasab-an kini sa wala pa mahitabo ang insidente.

Si Belleza midungag nga 9mm ang gigamit sa suspetsado sa pagpusil ni Ong ug distansiya lang og duha ka tiil ang gilay-on sa pagpusil.

Ang mga suspetsado napasakaan na og kasong robbery with homicide diha sa buhatan ni Fiscal Marshal Rubia.

Si Sr. Insp. Jason Mangaron sa pakighinabi niini sa Banat News kagahapon nagkanayon nga padayon pa ang ilang pag-monitor sa mga suspetsado ug nakig-ayuda na sila sa Cebu Provincial Police Office.

Gitataw ni Mangaron nga human na masang-at ang kaso batok sa mga suspetsado apan wala pa kini malutsi og warrant of arrest.