Cartographic sketch sa mipatay sa Kano ipagawas

Duna nay cartographic sketch ang Cebu City Police Office sa hulagway sa gidudahang maoy mipusil patay sa Amerikanong si Victor Noe kinsa gipatay niadtong Lunes sa hapon diin naangol usab ang iyang minyuanang Pinay diha sa Banawa, Guadalupe ning dakbayan.

Si Inspector Erlando Metante, ang acting chief sa Homicide Section mibutyag nga tulo ka mga cartographic sketches ang ilang gipahimo aron itakdo sa tanang mga namay-ungan sa mga testigo.

Si Noe ug ang kapuyong si Catalina Cabanes gipusil samtang nanganaog uban sa duha ka anak ni Cabanes sa nag-una niyang duha ka mga bana diha sa nahisgutang dapit.

Dunay di momenus upat ka mga testigos nga gituuhang makasuporta sa pagpalig-on sa kaso nga gihuptan karon ang kapolisan, duna pay duha ka mga lalaki kagahapon nga mipatim-aw sa Homicide Section aron paghatag usab sa ilang nasayran.

Matud pang Metante nga sa tanang pagsukit-sukit sa ilang imbestigasyon sa anggulong ilang gisubay kanunay gyung motumbok ngadto sa ilang gidudahang mastermind.