Polis di pasuoton og mga alahas — Napolcom

Higpit gayod nga ipatuman sa tanang sakop sa kapolisan ang pagdili kanila sa pagsuot og alahas nga mao na hinuon ang makapatumaw sa katahap sa katawhan nga nalambigit sila sa mga ilegal nga kalihokan.

Kini ang nasayran kang Atty. Homer Marino Cabaral, assistant director sa National Police Commission (Napolcom) nga gikahinabi sa Banat News kagahapon.

Si Cabaral miingon nga ilang gipaabot ang kamandoan gikan sa ilang ulohang buhatan nga basehan sa pagpahamtang og silot sa mga polis nga makalapas sa mga lagda.

Matud pa niya nga ngil-ad gayod kaayong tan-awon alang sa usa ka sakop sa kapolisan nga magsul-ob sa uniporme nga naggilak sa mga alahas nga bulawan ang kalawasan.

Dugang pa niya bisan gani mga ordinaryo nga kawani sa kagamhanan gidid-an pagsuot og alahas subay sa code on ethical standard isip kawani sa kagamhanan.

Giklaro ni Cabaral nga may mga alahas nga mahimong isul-ob nga sama sa wedding ring alang sa pag-ila sa usa ka polis nga minyo na ug aduna na kini asawa.

Samtang ang mga polis nga makabaton og mga luhong sakyanan ang angay gayod nga ipaubos sa lifestyle check dugang pa sa opisyal.