Nangulatag huyang gipamusil, 1 patay

Manag-agaw gipamusil ug usa niini ang namatay sa tambalanan human mitumaw ang panaglalis gawas sa videokihan kagahapon alas 2 sa kadlawon sa Poblacion Tuburan.

Ang mga biktima mao sila si Reden Hernandaz Gallarde, 22, ug Israel Gallarde Ramonida, 19, ang duha pulos mga ulitawo molupyo sa Barangay 6 Poblacion ug gitumbok nga namusil mao si Ebe Macapaz, hingkod ang pangidaron, taga Barangay Colonia Tuburan.

Base sa imbestigasyon sa kapulisan sa Tuburan, sa wala pa mahitabo ang panaglalis giingon ang duha ka biktima nangulata kini og mga mahuyang diha sa maong lugar. Ang duha nag-inom dayon sa videokihan diin nitumaw ang mainiton nga panaglalis ni Reden ug sa suspek sa gawas sa videokihan nga miresulta sa pagpamusil gamit ang .357 revolver.

Ang duha daling gihatod sa Tuburan District Hospital, apan pipila ka minutos nakabsan sa kinabuhi si Reden.