Duha nabiktima sa mga mangunguot samtang nagpaabot sa GMA 'Kapuso day'

Midangop sa kapolisan ang duha ka biktima sa pagpanguot atol sa gipasiugdahang programa sa GMA 7 sa sulod sa Mandaue City Cultural and Sports Complex niadtong Sabado sa buntag.

Kini ang nasayran sa Banat News kang PO2 Estephane Amamag-id sa kapolisan sa Presinto 1 sa barangay Centro, siyudad sa Mandaue.

Ang mga biktima mao sila si Leonila Caro, 56 anyos, minyo nga taga Mactan Airbase sa dakbayan sa Lapu-Lapu.

Matud pa ni PO2 Amamag-id nga nawad-an sa iyang pitaka ang biktima nga may sulod nga salapi nga mokabat sa P3,000 ang kantidad.

Samtang si Michael Canas, 32 anyos, minyo nga taga barangay Alang-Alang, siyudad sa Mandaue ang nawad-an usab sa iyang cellphone nga P20,000 ang kantidad.

Sa nasayran kang Amamag-id nga gihugopan sa daghang mga tawo ang Kapuso Program sa GMA 7 nga gitambongan sa mga dinapit nilang mga artista.

Giasoy sa duha ka biktima nga ang mao nilang mga butang ang kalit lang nga nahanaw sa ilang mga bulsa dihang nagdasok ang daghang mga tawo nga ilang gituohang gikuha kini sa wala hiilhing mga mangunguot.