PMG protektor sa drugas, sugal sa Toledo - mayor

Gipasanginlan ni Mayor Arlene Zambo ang Provincial Mobile Group (PMG) nga nagbase diha sa Lutopan, Toledo nga palpak sa ilang trabaho nga matud pa nahimong protektor sa ilegal nga kalihukan sa maong siyudad.

Mao kini ang hinungdan nga nagplano ang mayor nga pagpahawaon ang PMG sa maong siyudad.

Apan ang hepe sa PMG sa Lutopan nga si Sr. Insp. Julian Entoma miingon nga dili makiangayon ang plano ni Zambo tungod kay trabaho sa Toledo City Police Office ug dili ila ang pagsumpo sa ilegal nga drugas ug sa ilegal nga sugal.

Gipasabot ni Entoma nga ang mando ni Cebu Provincial Director Vicente Loot nila mao ang pagsumpo sa insureksyon sa ilang hurisdiksyon.



Matud niya nga andam tumanon sa PMG diha sa Lutopan kun dunay kamanduan nga nagpahawa kanila sa ilang assignment.

Apan kini ilang tahuron kun ang mando maggikan ni Loot.

Si Entoma miingon nga wala pa siyay nadawat nga kamanduan gikan ni Loot nga opisyal nga nagbalhin kanila sa ilang assignment.

Gitataw hinoon ni Intoma nga niminos ang presensya sa mga rebeldeng New People's Army sa mga lugar nga nagbase sa Lutopan.