Tungaon nalang ang PUJ - M'daue pasudlon sa city

Dili matuman ang desisyon ni Mayor Tomas Osmeña pagsuspenso sa implemintasyon sa City Ordinance 1837 bali og 90 ka adlaw aron katugotang makapadayon sa pagpamasahero ang mga PUJ unit gikan sa Mandaue lahos sa Osmeña Boulevard sugod karong untang Lunes.

Kini human nasabutan atol sa tigum sa Citom Board kagahapon nga ang amended ordinance nga gitawag nila og compromised ordinance nga nagbahin sa Mandaue-Jones nga rota maoy sagupon ug ipatuman ug dili ang nakab-ot nga desisyon sa mayor.

Nahunahunaan kining maong paagiha human gipahibalo ni Konsehal Sylvan Jakosalem, tsirman sa committee on transportation atol sa maong tigum nga ipahigayon na ang final deliberation sa maong ordinansa karong Miyerkules.

Matud sa konsehal nga kining maong ordinansa gipaboran sa mga drayber nga mitambong sa milabay'ng public hearing.

Ubos niining maong ordinansa, sa kapin sa 400 ka unit sa Mandaue Jones nga rota ang katunga na lang niini ang mopadayon og sulod sa Osmeña Boulevard samtang ang laing tunga niini adto na kutob sa Ayala Terminal.

Apan giklaro sa konsehal nga human unya sa deliberasyon niining maong ordinansa karong Miyerkules dili usab kini dayon ikapatuman gumikan kay ipa-publish pa kini ug human pa sa 15 ka adlaw mahimong hingpit nga ikapatuman.

Gihangop ni Mayor Osmeña ang maong lakang gumikan kay matud niya mas labaw pa kaayo kini sa iyang gipasalig nga 90 ka adlaw sa mga Mandaue drayber nga tugotang makapamasahero lahos sa Osmeña Boulevard.

Giawhag hinuon sa mayor ang mga Mandaue drayber nga magpaabot lang og gamay hangtod nga hingpit nga kaaprobahan ang maong ordinansa.

Subling giklaro ni Osmeña nga ang iyang kaikog ug pagrespeto kang Gobernador Gwendolyn Garcia maoy hinungdan nga gihatagan niya og rekonsiderasyon ang hangyo sa mga drayber nga sakop sa NADSU.

Apan giklaro sa mayor nga wala kini magpasabot nga gibati siya og kahadlok sa mga sakop sa NADSU nga maoy padayong misupak niining maong ordinansa.