Negosyante gibunotan og .9mm sakop sa SWAT

Usa ka negosyante gibunotan diha sa tunga sa karsada og 9mm sa usa ka polis sa Special Weapons and Tactics (SWAT) sa Cebu City Police Office sa miaging adlaw alas 4:30 ang takna sa Sitio Bag-ong Dan, Yati, Liloan.

Midangop sa kapolisan human sa insidente mao si Arsenio Sanchez Soronio Sr., 52, nga taga Tayud Consolacion uban sa iyang anak nga si Arsenio Jr., 27, ug si Jerome Sanchez, 27.

Ang gireklamo nga sakop sa SWAT Team mao si PO2 Arthur Sabang hingkod nga nagpuyo sa Rapulay Tayud, Liloan.

Si Soronio adunay dakong fabrication nga naa nahimutang sa Tayud Consolacion.

Si SPO4 Eleazar Salumon sa Liloan nga nahinabi kagahapon sa Banat News nagkanayon nga sakay si Soronio Sr. sa iyang sakyanan nga Pajero nga gimaneho sa anak ug diha sa luyo naglingkod si Jerome.

Sa paghidangat nila sa maong lugar dihay usa ka traysikol nga nagpakanaog sa iyang pasahero daplin sa karsada.

Apan sa pag-overtake ni Soronio Jr. sa traysikol ilang gikasugat si PO2 Sabang sa tunga nga nagdala sa iyang motorsiklo paingon na mopauli sa ilang pinuy-anan.

Giingong kalit lang mihunong si PO2 Sabang diha gyud sa tunga ug mibabag sa Pajero.

"Si Soronio Sr. nanaog sa Pajero aron unta duolon si PO2 Sabang, pero mibunot man hinuon sa iyang 9mm diha sa hawak," matud pa ni SPO4 Salumon.

Matud ni SPO4 Salumon nga gimanduan ang biktima nga si Soronio Sr. nga mopakita kagahapon sa buntag sa iyang buhatan ni Chief Supt. Silverio Alarcio Jr. sa PRO-7 aron ipaubos sa imbestigasyon ang maong naasoy'ng polis.