Seniors nangreklamo sa Malacañang tungod sa VAT

Mireklamo ang mga edaran ngadto sa Malacañang gumikan kay wala na matuman sa kagamhanan ang paghatag kanilag diskuwento nga 20 porsento sa mga tambal ug uban pang serbisyo tungod sa value added tax.

Si Engr. Antonio Cervantes, Regional President sa National Federation of Senior Citizens sa Central Visayas miingon nga ilang gipadad-an og suwat si Presidente Gloria Macapagal Arroyo nga naghangyo nga ipa-way-labot sila sa VAT.

Ang VAT usa ka balaod nga matag paliton sa usa ka magbubuhis magbayad usab siya og 12 porsiyento sa katibuk-ang mabayran niya alang sa VAT.

Maoy hinungdan nga para sa mga senior citizen ang 20 porsiyento nga diskwentong gihatag sa balaod kanila, matag mapalit nilang tambal, pagkaon, o kaha plete sa sakyanan, tarhaan o kibrahan og 12 porsyento, busa ang tinuod nga diskuwento nga napahimuslan nila, 8 porsyento na lang.

Miingon si Cervantes nga ilang gipaklaro kang Presidente Arroyo kon hain ang balaod nga angayang matuman niini alang kanilang mga edaran.

Kun ipatuman kanilang senior citizen ang VAT, nagkahulogang gilapas pag-unay sa gobyerno ang balaod nga Republic Act 7432 nga giusab ngadto sa RA 9257 nga naghatag kanilag 20 porsyento nga diskuwento.

Maoy hinungdan nga sa usa ka resolusyon nila, ilang gipangusgan pag-awhag ang Pamuno nasud nga himoon silang gawasnon sa VAT aron nga dili malapas sa gobyerno ang balaod bahin sa diskuwento kanilang mga edaran.

Si Cervantes kinsa maoy presidente sa senior citizen sa Talisay City miingong gipaabot usab nilang aprobahan sa Kongreso ang balaodnon nga maghatag og P1,000 pension matag buwan niadtong mga SC nga wa gyu'y gidawat nga pension gikan sa GSIS ug SSS.

Samtang ang pensionado sa GSIS ug SSS, umentohan usab og tag P1,000 ang ilang binuwan nga pension.