Nunot niini gipahibalo ni Majority Floor Leader Jocelyn Pesquera nga walay mga kausaban sa mga committee chairmanship aron dili ma-apektuhan ang mga nasugdang programa sa mga lainlaing komitiba gumikan kay eleksiyon sa sunod tuig.
Niadtong miaging adlaw mipatawag og tigum si acting Mayor Michael Rama nga maoy presiding officer sa konseho ug gituki ang umaabot nga 10th inaugural session sa Sangguniang Panlungsod.
Matud ni Pesquera nga dunay gidugang nga laing posisyon alang sa pagka 2nd assistant majority leader nga wala itug-an sa konsehal kun kinsay ilang nasabutan nga ibutang niining maong posisyon.
Apan matud sa usa ka kasaligang tinubdan si Konsehal Arsenio Pacaña maoy gikasabutan sa konseho nga pulos sakop sa Bando Osmeña Pundok Kauswagan (BOPK) nga itudlong 2nd assistant majority leader.
Kini tungod kay sila si Pesquera nga maoy majority leader anaa na sa ikatulo ug katapusang termino samtang ang assistant majority leader nga si Konsehal Procopio Fernandez anaa na usab sa katapusang termino.
Si Osmeña nga atua pa karon sa Japan gipaabot nga mopauli og balik tapos karong semana aron mohatag sa iyang inaugural speech nga nagsukip sa iyang mga programa karong tuiga.