Waway nadakpan: Mihimakak sa mga pasangil batok niya

Pinangitang giingong sakop sa Alpha Kappa Rho nadakpan sa mga sakop sa Mobile Patrol Group diha sa sudlonong bahin sa Duljo-Fatima ning dakbayan atol sa duwa sa basketball.

Si Mark Anthony Cano Vasayllaje alyas Waway, 22, taga Spoliarium sa samang barangay nadakpan sa kapolisan usa ka gabii human kini pasanginling namusil sa usa ka batan-on nga si Gibson Yap kinsa nagpuyo sa Plastikan sa maong barangay.

Si Vasayllaje nalandig sa tambalanan gumikan sa mga bun-og nga naangkon ilabi na sa tuong kilay ug mata ug mga pangos sa kalawasan nga matud pa sa kapolisan gumikan sa pagsukol ug paglugnot niini dihang gidakop.

Ang Homicide Section mitumbok kang Vasayllaje nga sakop sa Alpha Kappa Rho ug nalambigit sa pagpatay sa usa ka nag-awol nga polis, usa ka tanod duha na ka semana ang milabay, usa ka traysikad driver, ug sa gitulis ug gipatay nga Indian national nga pulos nahitabo sa maong barangay.

Apan sa pakighinabi sa mga tigbalita kang Vasayllaje kagahapon gipanghimakak niya ang tanang pasangil gawas lang sa traysikad drayber nga giingon niyang mihulga kaniya nga siya patyon.

Matud pa ni Vasayllaje di siya sakop sa Akrho ug Tau Gamma Phi dungan sa pagpakita sa iyang duha ka pulsohan sa kamot ug dughan nga wala siya'y 'ritual' sa maong mga fraternity.

Ang nakita sa media mao ang mga bun-og nga nahiaguman niini atol sa pagdakop gawas pa sa dakong gisi diha sa iyang tuong kilay nga sa ulahi gitug-an ni Vasayllaje nga naigo sa bato dihang gibato sa mga tawo ang mga polis.

Ang mga midakop kang Vasayllaje mao sila si SPO3 Benjamin Diloy, SPO1 Daniel Tarucan, PO3 Jaime Aparre, PO1 Edcel Petricio ug PO1 Richard Condes nga mga sakop sa MPG cars 239 ug 232 nga napugos pagpasalba sa ilang mga armas dihang gidugokan sa mga tawong gipangayoan og tabang ni Vasayllaje.

Si Vasayllaje dunay duha ka nagpaabot nga warrant of arrest sa kasong homicide ug slight physical injuries sa mga sala nila ni RTC branch 16 Judge Simeon Dumdum ug RTC branch 14 Judge Raphael Yrastorza.

Si Supt. Pablo Labra sa Criminal Investigation and Intelligence Branch mihulagway kang Vasayllaje nga "toughie" kun "bagsik" diha sa ilang lugar ug gihikay na ang rekomendasyon alang sa posibleng paghatag og pahalipay ngadto sa mga nakadakop kaniya.



Ang abogado ni Vasayllaje nga si Atty. Celedonio Manubag sa interbyu sa mga tigbalita mibutyag nga posibleng pasakaan nila og kaso ang mga polis nga midakop sa iyang kliyente tungod sa nahiaguman niining mga bun-og, nangangkon si Manubag nga dunay mga nakakita pagkulata sa mga polis kang Vasayllaje apan iya pa unang pakig-estoryahan ang iyang kliyente aron hikayon og una ang pagpapiyansa niini.

Dako ang pagtuo ni Manubag nga nasaypan ra si Vasayllaje gumikan kay daghan kaayong mga migamit og alyas nga "Waway" diha sa Duljo-Fatima.

Pipila na ka bulan ang nilabay usa ka sakop sa Tau Gamma Phi fraternity nga si Warren Entera ang gidakop pinasikad usab sa warrant of arrest nga nagtangag og alyas Waway, samtang duna pay laing nigamit og alyas 'Waway nga ginganlan og Warren Quijano nga nalambigit usab sa pagpamusil diha sa samang barangay.