Ulo sa mag-uuma nga gipusil sa gikalalis nababha

Nababha ang ulo sa usa ka mag-uuma kinsa gipusil sa iyang gikalalis nga grupo sa mga batan-on niadtong Sabado sa hapon pasado alas 4 ang takna didto sa Sitio Tagaytay, Lawaan, Danao.

Naabtan nga wala nay kinabuhi sa iyang asawa ang biktimang si Lope Gomez Tariao, 61 anyos, mag-uuma sa maong dapit, nga adunay samad pinusilan sa ilang ulo nga maoy nakaingon sa hinanaling kamatayon niini.

Sa taho nga nahidangat sa Provicial Police Office nasayran nga ang hepe sa tanod nga si Jolito Manco, 42, maoy mipahibalo sa kapolisan nga adunay gipusil sa Sitio Tagaytay hinungdan ang grupo ni SPO2 Roberto Canencia daling niadto sa dapit uban sa mga sakop sa 78th Infantry Battalion nga nagbase sa Barangay Dungu-an nga gipangulohan ni Corporal Jose Jeseryl Elecierto, PFC Cirilo Catubay, ug PFC Romel Aguirre.

Matud pa nga ang biktima nag-inusara lang sa ilang balay niadtong tungora kay ang asawa niini nga si Marcelina mibisita sa ilang mga anak sa Barangay Taboc sa maong siyudad.

Sa pagbalik niini nakit-an na lang sa asawa ang biktima nga nagkaob na sa yuta ug ang tuong kamot niini nagkupot pa og guna nga naglumid sa daghang dugo ug may samad sa ulo.

Sa imbestigasyon nga gihimo ni SPO2 Canencia nasayran nga adunay grupo sa mga kalalakin-an ang nangayam og langgam.

Sa wala pa matino nga hinungdan nagkalalis ang biktima ug ang grupo nga miresulta sa pagpamusil ngadto sa biktima.