Tindera'g ukay-ukay nakuhaa'g shabu

Tindera og ukay-ukay nasikop nga namaligya og shabu didto sa L. Cantorio Highway, Looc, Danao sa milabay'ng gabii.

Ang nasikop mao si Mardonia Pinas Alvaro, 49, minyo ug lumolupyo sa maong dapit, usa ka ukay-ukay vendor.

Base sa imbestigasyon sa Danao Police Station nasuta nga gipangunayan ni Danao City Police Chief Supt. Larson Dechino ug mga sakop sa Special Operations Group (SOG) ubos sa City Mayor's Office ang paghatod sa search warrant nga gi-isyu ni Cebu City RTC Branch 13 Hon. Judge Mendrado Paredes sa kasong pagpamaligya og ginadiling drugas.

Matud pa ni Dechino ang mga sakop sa SOG nakamatikod nga gawas sa pagpamaligya og ukay-ukay, si Alvaro nalambigit sa pagpayuhot og shabu hinungdan nga ilang gikuhaan og search warrant ngadto sa korte.

Atol sa paggawas sa maong search warrant wala maglangay ang mga elemento sa SOG ug Danao police, mihimo dayon kini sa pagronda sa tindahan ni Alvaro mga alas 6 sa milabay'ng gabii.

Nakuha sa mga otoridad ang upat ka gagmay'ng pakete sa gituohang shabu, mga kagamitan sa pagsuyop og shabu ug salaping cash nga mobalor og P8 mil sa nagkalain-laing dinominasyon nga gituohang halin sa pagpamaligya og shabu.

Ang mga ebidensiya gisumiter na ngadto sa PNP Crime Laboratory, samtang si Alvaro gitanggong karon sa Danao Police Station.