Acting kap sa Guadalupe nakig-'war' sa konseho

Mideklarar og gubat ang acting Barangay Kapitan sa Guadalupe Ruben "Ben" Baculi ngadto sa iyang mga sakop sa konseho atol sa gipahigayong sesyon niini kagahapon sa buntag.

Misaka ang emosyon ni Baculi human giduso ni Barangay Konsehal Dino Faelnar ang pag-awhag sa Ombudsman-Visayas pag-imbistigar sa gikatahong ilegal nga pagbaligya sa gubaon nga compactor truck sa barangay ngadto sa usa ka Eduardo Labura sa kantidad nga P30 mil nga walay gipahigayong bidding ug walay pagtugot sa konseho.

Giangkon ni Baculi nga walay pormal nga bidding nga napahigayon apan iyang giinsister nga dunay daghang mga bidders nga interesadong mopalit sa maong gubaon nga sakyanan.

Masuk-anong mibahad ang kapitan nga andam siya og tagana mosukol sa iyang mga konsehal ug atubangon niya kini bisan sa Ombudsman.

Laing ebidensya ang gipresentar ni Faelnar atol sa sesyon nga magpamatuod nga P30 mil ang pagkahalin sa maong sakyanan apan P10 mil lang ang gitug-an ni Baculi.

Gawas niini, duna nay resolusyon ang konseho sa barangay niadto pang milabay'ng tuig alang sa pagbaligya sa maong unom ka mga sakyanan og karung bag-o dunay ammended resolution alang sa pagtugyan sa maong mga sakyanan ngadto sa City Hall.

Natigayon ang pagsukitsukit sa konseho sa maong kwestyonabling transaksyon human sa previlige speech ni Konsehal Alex Semilla nga nag-awhag sa pag-inhibit kang kapitan Baculi aron ibutang si Konsehal Rodrigo Gabutan isip temporaryong presiding officer.

Gipasabot ni Faelnar nga ilang gisukitsukit ang maong natimaho-an nila nga kwestyonabling transaksyon gumikan kay nabalaka sila nga ma-apil silang tibuok sakop sa konseho nga manubag unya niini ilabi na kun mo-asumer na og balik si Kapitan Eugenio "JingJing" Faelnar sa unang semana sa Hulyo.

Mitumaw ang maong kagubot ni Baculi ngadto sa konseho samtang nagpabilin nga nagserbisyo sa tulo ka bulan nga preventive suspension si Faelnar sa kaso niining giatubang sa Sandiganbayan nga gipasaka sa gitaktak nga kanhi project engineer sa ABC.

Apan giinsister ni Baculi nga daan na siyang nakamatikod nga giplanohan sa iyang mga kaubanang konsehal gumikan kay nagtuo siya nga dili kini makadawat nga siya maoy magsilbing kapitan sa Guadalupe.