Live-in pushers sikop sa Toledo

Gidudahang mamaligyaay og ginadiling drugas nga manag live-in partner nasikop sa kapolisan kagahapon sa alas 5:15 sa buntag diha sa Poblacion, Toledo.

Ang pagpangronda gipangulohan ni Sr. Insp. Ellaquim Awit ug mga kauban, mironda sa panimalay ni Salvador Diano, Jaranilla alyas "Buddy" ug iyang live-in nga si Anecita Algaba Paculanang, pulos hingkod ang pangidaron.

Nagdala sa search warrant ang kapolisan nga giisyu ni Cesar Estrera, sa Regional Trial Court Branch 29, sa Toledo City.

Nakuha sa duha mao ang pito ka pakete nga may sulod nga gituhoang shabu, laing upat ka dagko nga gisulod og plastik, nga gituohan nga may sulod nga shabu, shabu paraphernalias, usa ka stick sa marijuana, tulo ka unit sa cellular phone, ug kwarta nga mobalor og 1,027, nga gituhoang halin sa ilang pagpamaligya sa ginadiling drugas.

Si SPO3 Henry Acosta sa Toledo City Police Station sa dihang nahinabi sa Banat News miingon nga taudtaod na nga ilang gipanid-an ang duha bahin sa ilang ilegal nga kalihukan, tungod sa mga taho nga ilang nadawat nga grabe ang pagpamaligya og shabu hinungdan nga ilang giaplayan og search warrant.