Gipatay huma'g trabaho

Gipusil patay ang usa ka construction worker samtang nagpaabot sa sakyanan pauli na unta sa ilang dapit didto sa atubangan sa Shangri-la Mactan sa milabay'ng gabii.

Ang biktima mao si Maximo Enanor Bugtong Jr., 22, ulitawo, lumad nga taga Sitio Caimito, Gun-ob, Lapu-Lapu, construction worker sa Fareal Builders Inc. nga nagtrabaho sa Shangri-la Mactan.

Base sa imbestigasyon ni PO3 Manolito Abellanosa sa homicide Section sa kapolisan sa dakbayan sa Lapu-Lapu nga usa ka saksi nga si Ronilo Larin, drayber sa traysikol, nga iyang nakita si Maximo nga nag-atang og sakyanan pauli na unta sa dihang giduol kini og usa ka tawong nagkalo og itom ug itom usab ang sinina nga dayong pusil sa biktima.

Matud pa ni Larin nga nakadagan pa kini og pipila ka metros sulod sa maong hotel apan nahagba kini ug nakabsan sa kinabuhi.

Human sa maong insidente yano ra kaayo nga naglakaw pahilayo ang maong mamumuno, samtang ang mga sakop sa ERUF nga mitabang sa biktima mideklarar nga patay na kini gumikan sa iyang samad pinusilan sa likod agi sa wala pa matinong kalibre sa armas.