2 taxi drivers gitulis; 1 patay

Duha ka mga drayber sa taksi ang gipangtulis sa managlahing higayon ug dapit diin ang mga biktima parehong misukol sa mga tulisan apan usa kanila napatay samtang naluwas ang usa bisan sa samad pinusilan sa ulo.

Patay nang midangat sa tambalanan ang biktimang si Arturo Permito,34, minyo ug residente sa Cubacub, Mandaue kinsa nakaangkon og daghang mga samad dinunggaban sa iyang kalawasan.

Duha ka wala mailhing mga batan-ong gibana-banang 18 ngadto sa 20 anyos ang nakit-ang pasahero sa biktima nga nagdali-dali og kanaog sa Holiday taxi nga may body number 39 ug plakang LVK-416.

Usa ka babaye maoy nakasaksi sa hitabo dihang nagdaling nanganaog ang mga suspek.

Sumala pa sa imbestigasyon sa Homicide Section nagsunod ang motorsiklong giluwanan sa testigo diha sa taxi dihang kalit kining nag-ekis ekis ug nahunong diha sa tunga-tunga sa kalsada sa Nasipit, Talamban ug daling nanganaog ug nanagan ang mga suspek.

Dihang gisusi sa testigo nakit-an niining nag-agas pa ang dugo sa kalawasan sa biktima apan buhi pa kini maong dali niyang gipamara ang ubang mga sakyanan ug mga taxi aron matabangan ang biktima.

Ang grupo nila ni SPO1 Manuel Maryuela ug PO1 Romel Cesita sa Mobile Patrol Group 237 maoy daling midala kaniya sa North General Hospital apan gideklarar kining dead on arrival.

Apan ang nakapahibulong sa kapolisan mao nga wala mawala ang pitakang may sulod nga P900, relo de pulso ug cellphone sa biktima. Gituohang naratol ang mga suspek dihang nakit-ang dunay nagsunod kanilang motor ug daling miikyas.

Ang maong kaso giimbestigahan na usab nila ni SPO3 Isagani Pugoy sa Theft and Robbery Section.

Samtang sa laing bahin, samdan sa agtang human pusila sa duha usab ka tulisan ang usa ka taxi driver diha sa Saac, Buaya dakbayan sa Lapu-Lapu sa milabay'ng gabii.

Ang biktimang si Judito Alegado Echavez, 34, minyo nga nagpuyo sa Sudlon, Lahug dakbayan sa Sugbu swerteng nakatapi sa kalibre 45 pistola sa suspek nga mipusil sa iyang agtang sulod sa taxi human makuha ang iyang kinitaang P2,100.

Base sa imbestigasyon sa TRS sa dakbayan sa Lapu-Lapu matud pa sa biktimang drayber sa Spider taxi nga may plakang GXB-547 gipara sa duha ka wala mailhing mga lalaki sa Pusok sa samang dakbayan ug buot magpahatod sa Ibo sa susamang dakbayan.

Pag-abot sa usa ka ngitngit nga dapit ang duha ka mga pasahero kalit mibunot og armas 45 kalibre dayong tion kaniya ug deklarar nga tulis. Tungod sa kabalaka gihatag niya ang kinitaan.

Human nga gitunol ang maong kwarta usa sa tulisan ang mipusil kaniya apan natapi niya kini hinungdan sa iyang pagka-igo sa toong kilid sa ulo ni Echavez.

Buot unta siyang tiwasan sa laing suspetsado apan kini nakalighot ug miambak sa maong sakyanan hinungdan nga wa kini maigo.

Ang duha ka mga suspetsado misud sa usa ka bunkhouse sa construction site sa maong dapit ug nag-ilis sa ilang mga sinina ug pantalon dayong pahilayo sa maong dapit.

Ang mga trabahante sa maong construction mao na ang naghatag sa maong mga sapot sa duha ka tulisan ngadto sa kapolisan.

Si Echavez gidala sa mga kaubanang taxi driver sa Velez Hospital ug luwas na sa kakuyaw nga kahimtang, samtang ang kapolisan padayon pa ang ilang pag-ila sa duha ka mga tulisan.