Plano sa summit giduso sa M'daue

Hingpit na nga nakaduso ngadto sa buhatan ni Department of Public Works and Highway (DPWH) Secretary Hermogenes Ebdane ang kagamhanan sa dakbayan sa Mandaue alang sa ilang plano nga pagpatahum ug palapad sa kadalanan niini.

Kini alang sa paghatag og kasayuran sa mga gihimo sa dakbayan sa ilang mga pagpangandam alang sa 12th Association of Southeast Asian Nation (Asean) Summit karon Disyembre niining tuiga.

Si Ouano nga gikahinabi sa Banat News miingon nga nagkinahanglan og dakong pundo alang sa pagpatuman niining maong proyekto nga maoy hinungdan nga nagpatabang karon sila sa mga negosyante.

Sa nasayran kang Ouano nga nalakip sa mga dalan nga ilang hatagan og pagtagad alang sa pagpatahum ug pagbutang og mga sugang dagitab mao ang dalan Ouano Avenue sa Reclamation Area, mga dalan J. Plaridel, A.C. Cortes, UN Avenue, A.S. Fortuna, CD Seno St. A. Del Rosario St, SB Cabahug ug uban pa.

Nunot sa umaabot nga Asean Summit karong Disyembre ang kagamhanan sa dakbayan sa Lapu-Lapu, dakbayan sa Sugbo mihimo usab og susamang pagpangandam.

Si Gobernador Gwendolyn Garcia maoy chairperson sa Asean Summit alang sa pagpatahum sa kadalanan ang giabagan usab sa mga asawa sa mayor sa mga dakbayan ug kalungsoran.